Vinna vinna vinna...

Jæja þá er ég byrjuð að vinna aftur og er það þvílík gleði  og það var vel tekið á móti mér í morgun.  Já já Svava tók á móti mér með rós og allir buðu mig velkomna aftur.  Gott að finna að mín hefur verið saknað  því ég hef saknað þess líka að hafa verið í vinnunni.  Sérstaklega núna eftir áramótin þegar heilsunni hefur farið svona mikið fram og orkan kemur á ný.  Frábært alveg.

Við Sigrún fórum í hjólabæ áðan og völdum handa henni hjól.  Fjólublátt með stjörnum á og svo fékk hún bleikar grifflur og barbie bjöllu og allt.  Hún á Baby born körfu sem við skellum svo bara á hjólið.  En hún hefur svo annað hjól til að hjóla á inni í fjósi.  Þannig að hún verður væntanlega orðinn mikill hjólagarpur eftir sumarið

En Sigrún er alltaf að horfa á Ávaxtakörfuna og Bangsímon þessa dagana (það sem hún fékk í afmælisgjöf) og nú vella brandararnir út úr henni.  Einn er svona úr Ávaxtakörfunni:  Sagðirðu ber... ertu kannski allsber? ha ha ha.  Annar svona:  Bananasplitt.  Ef þú rennur á bananahýði ferðu í svona splitt... ba na na splitt.      Svo hlær hún mannamest.  Ótrúlega fyndið alveg.

Best að fara að huga að súpunni.  Er að elda þessa dýrindis grænmetissúpu,  ummm. 

Skrítið afmæli

Jæja þá er afmælisveislan hennar Sigrúnar búin og hún verður nú lengi í minnum höfð  Stebbi fór um morguninn í leit upp á Langjökul eftir símtal frá vini okkar um að sá væri búinn að týna félaga sínum.  Vinurinn fannst svo um 6 leytið í gærkvöldi heill á húfi en blautur og kaldur.  Hann brást hárrétt við þegar hann varð viðskila við félaga sinn og beið við sleðann sinn.   En allt er gott sem endar vel og var það mikill léttir þegar Stebbi hringdi í okkur og sagði okkur að hann væri fundinn. 

En afmælið gekk vel í alla staði.  Gómsætið rann út eins og heitar lummur og Sigrún fékk fullt af fínum gjöfum.  Föt, prinsessudót, 2 Dvd diska, liti og litabók, spil, pennaveski, myndaramma, litla skvísutösku, nokkrar bækur, kústasett í Sjónarhól og ekki má gleyma hjólbörunum en um leið og hún sá þær sagði hún að Reynir ætti þessar, he he.  Þannig að nú er hann búinn að eignast hjólbörur í sveitinni.  Við eigum enn eftir að gefa henni gjöfina en að öllum líkindum verður það hjól.

Stebbi kom svo heim um þrjúleytið í nótt.  Þeir höfðu staldrað við með þann týnda í skála þarna innfrá og grillað sér þar og slakað aðeins á. 

Nú situr Sigrún á skrifstofunni sinni og horfir á Ávaxtakörfuna.  Hún er búin að taka ástfóstri við hana sem er gott mál.  Þá hvílast aðrir diskar á meðan og hausinn á mömmunni   Alltaf gaman að læra eitthvað nýtt utan af því maður kann þetta orðið allt vægast sagt.

Svo förum við í afmæli á morgun til Reykjavíkur þannig að það er nóg að gera þessa helgina.  Bið annars að heilsa ykkur í bili. 

Það eru komnar afmælismyndir í albúmið á heimasíðu Sigrúnar.

4 ára í dag

Hæ hæ.

Sigrún mín er 4 ára í dag.  Hún fór með pabba sínum til Heiðu í afmælisklippinguna í gær og var alsæl.    Hún var líka voða spennt að fara í leikskólann í morgun því hún ætlaði sko að baka súkkulaðiköku fyrir afmælisveisluna þar.  Svo kemur fjölskyldan á morgun í kaffi   og hér sit ég og hvíli mig á milli terta.  Búin að gera stóra brauðtertu og skreyta hana voða flott og nú er bara að fara að þReyta rjómann og skella á marensinn og voila.  Allt að verða klárt    

Kíkti í Árbæ í morgun og hitti gellurnar þar.  Ég er orðin voða spennt að byrja aftur að vinna og þær líka heyrist mér.  Æ það verður voða gott að fara aftur í rútínuna sína.  Jah enginn veit hvað átt hefur fyrr en misst hefur.  Það eru eiginlega orð að sönnu. 

Hafið það gott um helgina kæru vinir og njótið þessarar löööööngu helgi út í ystu æsar.

Tannsi og afmæli

Jæja gott fólk.  Þá fórum við mæðgur til tannlæknis í dag.  Gekk það bara glimrandi vel og ég má vera stolt af skottunni.   Hún fékk að sjá öll tólin sem tannsi notar og líka hvernig stóllinn virkar og svona áður en hann skoðaði tennurnar.  Hún fékk sólgleraugu til að verjast sterku ljósinu sem hann notar.  Bara snilld.  Hún var voða dugleg og gerði allt sem hann bað um og fékk flúor í lokin.  Þetta gamla gula you know.  Svo fékk hún verðlaun á eftir.  Þegar hún var að velja sér eitt dót spyr hún tannsann hvort hún megi nokkuð fá tvö dót.  Því hún eigi nefnilega vin   he hehe allt í lagi að reyna.

En nú ætla ég að baka marens á morgun fyrir afmælið hjá Sigrúnu.  Hún verður sem sagt 4 ára á föstudaginn en að eigin sögn er hún lööööööngu orðin 4 ára.  Hún skilur bara ekkert í hvað allir segja að hún sé bara 3 ára.  Bara allir að ruglast   Hún er sko búin að biðja um hjólbörur í afmælisgjöf.  Hún á reyndar einar hjólbörur sem hún fékk þegar hún var 2 ára en það er sko ekki nóg.   "Mamma, ég verð að eiga einar handa Reyni þegar hann kemur í heimsókn."  Já það er sko alltaf verið að hugsa um vinina   Ekki amalegt að eiga svona vinkonu.

Ég fer svo í lyfjagjöf á fimmtudaginn en annað er nú ekki að frétta hér á bæ svo sem.  Stebbi byrjaður að slá upp sökklum í Brandshúsum hér í sveitinni.  Hann verður hér að smíða út júlí.  Það er ferlega notalegt að hafa hann svona nálægt kallinn   Þá fer líka enginn tími í akstur og svona.  Ágætis tilbreyting.

Bið að heilsa í bili.  Yfir og út!!

Afmæliskveðja

Í dag á hún Bogga mín afmæli og óska ég henni innilega til hamingju með daginn.    Ég talaði reyndar við hana áðan og við vorum báðar sammála um það að við værum löngu hættar að telja.   he he.  Þrjátíu og hvað!!

En það er nú óhætt að segja að börnin læri það sem fyrir þeim er haft.  Það sannaði sig nú heldur betur áðan þegar ég var í símanum (tala við afmælisbarnið) þegar Sigrún kemur til mín og segir:  "mamma, mamma... sjáðu hvað ég gat."  Þá var skvísan í tölvunni á einni barnasíðunni sem við fundum um daginn og var barasta búin að prenta út nokkrar myndir af stubbunum.  Hún hefur séð okkur svo sem gera hitt og þetta í tölvunni en maður veit svo sem ekkert hverju þau taka eftir.  Og þetta hefur hún lært án þess að við værum eitthvað að kenna henni það.  Mín bara bjargar sér.    Ja ég er bara svo hissa!!

Róleg helgi framundan og ég segi bara góðar stundir  

Ætti kannski að taka það fram að ég er búin að breyta kvittfyrirkomulaginu hérna á síðunni.  Þið þurfið ekki að fara í tölvupóstinn lengur til að ná í kvittið you know   eins og þetta var.  Mun einfaldara ekki satt.  Geri þá ráð fyrir að fleiri kvitti núna, ha!!!

Gleðilegt sumar

Heido alle hjupa.

 Það eru komnar inn nýjar myndir.  Bara svona til að gefa ykkur smá hugmynd um hvernig páskarnir voru hjá okkur.

 Hafið það gott kæru vinir og eigið gleðilegan fyrsta dag sumars á morgun.

 

Hvaða græni litur ertu?

Rakst á þessa skemmtilegu síðu um daginn:  http://blogthings.com  og athugaði hvaða græni litur ég væri.  Þetta kom út:

You Are Emerald Green

Deep and mysterious, it often seems like no one truly gets you.
Inside, you are very emotional and moody - though you don't let it show.
People usually have a strong reaction to you... profound love or deep hate.
But you can even get those who hate you to come around. There's something naturally harmonious about you.

Er eitthvað þarna sem passar???

Páskarnir búnir :o)

Jæja þá eru blessaðir páskarnir búnir og það er nú bara ágætt verð ég að segja.   Hóstinn er að aukast hjá Sigrúnu þannig að hún fer nú líklega ekki mikið í leikskólann þessa vikuna blessunin.

En við erum boðin í afmæli hjá Hafþóri "litla" frænda á fimmtudaginn (sumardaginn fyrsta) og ætli sé ekki bara best að halda skvísunni inni þangað til.  Hún virðist nú ekki finna til í eyrunum 7-9-13... og ég vona að þetta fari nú að lagast.  Hún var reyndar hitalaus í gærkvöldi en hóstar samt sem aldrei fyrr.  Hún er bara búin að dunda sér í dótinu sínu alla páskana og horfa MIKIÐ á barnaefni.  Þökk sé stöð 2 og rúv að við erum ekki alveg búin að fara yfirum af leiða þessa páskana

Jæja best að fara að ryksuga.  Heyrumst síðar gott fólk

Gleðilega páska

Góðan daginn allan daginn og gleðilega páska alle hjupa!!!

Við erum búin að hafa það ógeðslega gott um páskana og éta á okkur gat og svona.  Ja Stebbi er að sauma fyrir núna  muuuhhhaaaaaa.  Sigrún fékk 3 páskaegg þessa páskana og við leyfðum henni nú að opna það fyrsta á skírdag... það næsta á föstudaginn langa og það síðasta í dag.  Hún fékk nú ágætis hjálp við þau blessunin en hefur minnsta lyst á páskaeggi í dag enda er hún lasin.  Ég hélt þarna um daginn að hún væri bara öll að hressast en því var fjarri.  Hún er búin að vera með hita síðan á fimmtudag og er að kvefast líka.  Þannig að við tökum því rólega þessa dagana og pössum okkur á því að fara ekki of snemma út.

Málshátturinn minn var:  Fátt er svo ágætt að eigi finnist annað slíkt.

Hjá Stebba var þessi:  Góðleiki er mál sem mállausir geta mælt.

Sigrún fékk þessa:  Vinum er vandi sannsöglum að vera (frá ömmu Þuru og afa Ragga).  Morgunstund gefur gull í mund (frá ömmu Lóu) og Betra er að játa sannri sök en neita (frá okkur).   Þar hafiði það.  Spurning hvað passar við hvern... hmmmm...

Við vorum í matarboði hjá mömmu og pabba í gær.  Fengum læri, nautakjöt, ýmist meðlæti og sælgætisköku á eftir.  Voða ljúft og gott.   Sibba og co mættu líka og Guðrún og Þuríður en Maggi Palli var lasinn.  Vonum við nú að hann fari að hressast ásamt prinsessunni hér á bæ. 

Jæja best að fara að kúltrast upp í sófa með páskaeggið mitt  

Föstudagurinn langi

Stebbi er búinn að vera í leitinni á Langjökli frá því á miðnætti í gær og ég var að heyra í honum (kl. 10.30) að mennirnir eru fundnir og eru þeir heilir á húfi.  Það var nú aldeilis mikill léttir.

Sigrún vaknaði í nótt og var sjóðheit öll.  Ég náði að mæla hana í hálfa mínútu en henni finnst svo vont að láta rassamæla sig að hún verður alveg brjál.  Mælirinn sýndi þó um 38 stig á þessum stutta tíma svo að hún var pottþétt með mun hærri hita.  Ég gaf henni stíl og hún steinsofnaði aftur og vaknaði svo rúmlega 8 í morgun og virðist stálslegin   Hún er mjög líklega hitalaus núna og ég vona að þetta verði nú ekkert meira.   Hún var nú ekki alveg eins og hún átti að sér að vera í gær.  Hún sofnaði t.d. seinnipartinn bara hér heima í sófanum að horfa á barnaefni.  Það gerist aldrei núorðið.  Þannig að eitthvað var hún slöpp eða þreytt

Bið að heilsa ykkur í bili kæru vinir nær og fjær og segi enn og aftur...

  Gleðilega páska