Frábær Danmerkurferð

Við lögðum af stað á Keflavíkurflugvöll um 4 leytið aðfararnótt miðvikudagsins 23.apríl.  Fórum allar saman með skólabíl  og hittum Árbæjarskvísur við innritun því þær voru líka að fara til Danmerkur.  Áttum flug um hálf átta en okkur var boðið að fara með annarri vél 3 korterum síðar gegn því að fá allar frímiða sem gildir fyrir einn fram og tilbaka hvert sem er í Evrópu og við tókum því að sjálfsögðu

En jæja við vorum komnar til Danmerkur um kl. 14 á dönskum tíma og fórum í það að finna bílana okkar en við tókum 3 bíla til þess að fara á til Jótlands.  Fengum eitt gps tæki með en ein í hópnum hafði keypt sér slíkt tæki og notuðum við það sem vorum í fremsta bílnum og ókum sem leið lá til Jótlands.  Vorum frekar lengi á leiðinni þar sem við tókum smá aukarúnt í Vejle til að kíkja í BILKA   Það var fínt og keypti ég nokkra boli og peysur á Sigrúnu þar.

Við vorum nokkuð fljótar að finna húsið okkar, eða höllina öllu heldur því þetta var ekkert smá flott og stórt hús.  Ég fékk herbergi út af fyrir mig eða íbúð öllu heldur með sér baðherbergi og stofu við hliðina á herberginu.  Í aðalhúsinu var stórt eldhús og stór matsalur og baðherbergi og nokkrum herbergjum.  Uppi var svo risastór setustofa með billjard-borði, fótboltaspili, sófum, borðum og slíku og svona koníaksstofu með flottu útsýni.  Einnig var sjónvarp þarna en hinumegin við stigann voru fleiri herbergi, baðherbergi og svalir á 2 stöðum.  Geggjað hús í sveitasælunni. 

Við fórum á 3 leikskóla á fimmtudeginum, tókum daginn snemma og byrjuðum á einum sem heitir Knudsöhulen.  Hann er við hliðina á grunnskóla og er sami skólastjóri yfir báðum skólunum og svo eru deildarstjórar yfir hvoru húsi fyrir sig.  Við urðum strax allar ástfangnar af þessum leikskóla, eða umhverfinu og öllum náttúruefniviðnum á lóðinni öllu heldur því það var alveg frábært.  Staurar hér og þar í jörðinni og hengirúm hengt á milli, eitt stórt bálhús með kamínu inní og ísskáp þar sem börnin geymdu nestið sitt.  Bardagasvæði (sem ég útskýri nánar síðar), risarólur, risarennibraut og fleira og fleira. Frábær leikskóli þar sem börnin eru meira og minna úti allan daginn því húsið sjálft ber varla öll börnin í einu. 

Leikskóli nr. 2 heitir Myretuen og er leikskóli á hjólum   en hann er í sérsmíðuðum vagni og annar tengivagn sem settur er aftaní þegar hann er færður til.  Þessi leikskóli er í Ry (lítill bær) og er með 2 staði sem hann færir sig á milli á 6 mánaða fresti.  Þau eru í skóginum á sumrin og í hinum enda bæjarins á veturna.  En þarna voru þau komin í skóginn og börnin voru líka úti meira og minna allan daginn.  Á svæðinu voru þau búin að hengja áburðarpoka með plötu í botninum sem n.k. hengiróla (hugmynd fyrir Stebba minn ) og líka mjög háar rólur efst í trén, fínn sandkassi með kúluhúsi í eða helli sem þau gátu farið inn í, ein risaróla úr trefjakúlu (sem var búið að taka í tvennt), vír með belg á sem þau renndu sér á milli, drullumallakrókur og fleira og fleira.  Maðurinn sem tók á móti okkur er smiður og er einn af eigendum þessa leikskóla því hann er einkarekinn.  Hann stofnaði hann með systur sinni sem er leikskólakennari.  Þarna gátu verið 22 börn og allt inni í vagninum (sem og vagninn sjálfur) var smíðað og hannað af þessum smiði.  Ótrúlega sniðugt og hentar eflaust vel í Danmörku  

Sá þriðji sem við heimsóttum þennan daginn heitir Muldvarpen og þar var fyrsta lóðin sem við sáum afgirta því hinir 2 voru ekki með girðinu í kring.  Börnin eiga einfaldlega að þekkja hvar mörkin eru og þau passa upp á hvert annað.  En þarna var umferðargata við leikskólann þannig að ekki var um annað að ræða en að hafa hann girtan af.  Fínn leikskóli með stóru útisvæði og svona bálhúsi eins og við sáum á þeim fyrsta, nokkur dýr eru þarna eins og hænur, grísir (á sumrin) og fleira.  Ágætis leikskóli en kannski minna um nýja hluti fyrir okkur að sjá svona í heildina. 

Við vorum komnar í húsið okkar um kvöldmatarleytið og grilluðum þá kjúllabringur og fleira gott og fórum svo í Sing Star uppi í efra og tókum nokkra billjardleiki   Mjög skemmtilegt og mikið hlegið.

Á föstudeginum fórum við á síðasta leikskólann sem við skoðuðum í ferðinni og hann heitir Höndruphus (eitthv. svoleiðis) og er alveg í skógarjaðrinum á litlum bæ á Jótlandi.  Þar er heldur engin girðing, börnin vita hvar þau mega fara og hvar ekki.  Skógurinn á bakvið er risastór og fórum við í heljarinnar skógargöngu með einum kennaranum og elstu börnunum.  Svæðið býður upp á marga möguleika og börnin virðast þekkja og kunna vel á umhverfið.  Í garðinum við leikskólann er einnig frábært svæði og þau eru líka með nokkur dýr.  M.a. 3 geitur sem börnin hjálpa til við að fæða og hirða um.  3 risastórar kanínur eru líka og svo einn köttur.  Hann var mjög gæfur og vildi bara liggja í fanginu á manni og láta klappa sér.  Við borðuðum svo nestið okkar úti með börnunum og vorum þarna í eina 4 tíma.  Rosa skemmtilegt.

Við færðum leikskólunum öllum gjafir, m.a. stór plaköt af íslenska hestinum, kindinni og kúnni ásamt því að gefa staffinu súkkulaði og bingókúlur  og við gáfum þeim líka bókina "Ástarsaga úr fjöllunum" á dönsku og einnig ljósmyndir úr leik og starfi úr Krakkaborg.  Það voru allir þvílíkt ánægðir með gjafirnar og börnin hrifin af þessu öllu. 

Nú við kíktum svo í aðra BILKA búð seinni partinn á föstudeginum og fórum svo heim í hús og spiluðum pictionary við mikla gleði og glaum. 

Verslunarferð til AArhus á laugardeginum og þar var auðvitað kíkt í H og M og feiri búðir og ég mælti mér mót við Gunni vinkonu því hún býr í úthverfi AArhus og því ekki langt fyrir hana að koma.  Það var æðislegt að hitta hana og knúsa.  Yndislegt að hitta þig yfir Nachos og bjór

Áttum svo flug kl. 21.50 á sunnudagskvöld og því voru þreyttir ferðalangar sem mættu í vinnu á mánudagsmorgunn

Set inn myndir úr ferðinni við tækifæri

Ég er ...

... komin heim frá Danmörku.  Skrifa ferðasöguna seinna sem gekk rosalega vel í alla staði

Annars á hún Sigrún mín afmæli í dag   og er hún orðin 6 ára skvísan.  Ég held hún hafi bara stækkað á meðan ég var úti

Þið getið skrifað henni kveðju á http://barnanet.is/sigrunstef

Hej hej

Ég er ...

... farin til Danmerkur.

Sjáumst og  heyrumst eftir helgina       

Útivera

Það er mikið búið að vera úti um þessa helgi.  Veðrið búið að vera yndislegt og hjólin voru tekin út í dag   Við Sigrún hjóluðum á hjólunum okkar heim að Sviðugörðum og til baka.  Hún er orðin ansi klár að hjóla og örugg á mölinni því það er nú svolítið erfitt að hjóla á grófri möl þegar maður er lítill og léttur   En við pabbi hennar ákváðum að nú væri tímabært að prufa að taka hjálpardekkin af og leyfa skvísu að prufa að hjóla þannig.  Það var nú ekki að ganga neitt svakalega vel en æfingin skapar meistarann ekki satt?!  Þannig að nú verður bara æft stíft næstu daga til að ná jafnvæginu og læra á þetta.

  Læt fylgja hér með nýjustu teikninguna hjá Sigrúnu.  Ég var að búa til boðskort í afmælið hennar og þetta teiknaði hún á meðan.  Hatturinn er örugglega nornahattur því það verður búningafjör í afmælinu hennar

Nú er ég byrjuð að pakka fyrir ferðina miklu sem er eftir aðeins 2 daga   Spennan magnast...

Þangað til næst

Stórsniðugt!

Ég verð nú bara að taka að ofan fyrir bæjarráði Árborgar því þetta er algjör snilldarhugmynd.  Það er nefninlega bæði dýrt og óþarft að þurfa alltaf að fara á bíl í styttri ferðir sem eru þó kannski of langar vegalengdir og tímafrekar ef á að labba þær.  Ég vildi óska þess að ég kæmist á hjóli í vinnuna   Þegar ég bjó í bænum hjólaði ég oft, bæði í skólann og í vinnuna sem var þónokkur spotti.  Þetta fannst mér bæði þægilegt og svo auðvitað mjög heilsusamlegt.

Þannig að þeir eiga hrós skilið í ráðhúsinu finnst mér fyrir þetta framtak.  Og það gat nú verið að minnihlutinn tæki ekki undir þetta framtak   Svo virðist sem meirihluti og minnihluti geti aldrei verið sammála um nokkra skapaða hluti.  Undarlegt alveg.

Ráðhúshjól keypt á Selfosi

Augnaðgerðin...

... verður gerð 6.maí   Ég fékk staðfestingu á því í þessari viku.  Þá verður sem sagt sett rör í hægra augað og með því losna ég vonandi við táraflóðið sem hefur varað nú hátt í 3 ár   Ja síðan í september 2005.  Mér finnst eins og það sé nú bara svona ca 1/2 ár eða svo.  Svona er þetta fljótt að líða allt saman. 

Tveimur dögum seinna á ég 20 ára fermingarafmæli!!! Getur það verið????  Er ég orðin svona háöldruð?????  Neeee er það ekki 10 ára?  Hehehe   Ég mun væntanlega halda upp á það með Panodíl og vatni   og skoða gamlar myndir, ja svona með öðru auganu   

Fór annars á góðan íbúafund í gærkvöld í Flóaskóla um uppbyggingarmál skólanna í hreppnum.  Vel var mætt á fundinn og ýmsar góðar umræður komu fram og skoðanir íbúa á þessum málum.  Það verður spennandi að sjá hvað verður gert með tilliti til leikskóla og eins framhald Flóaskóla.  Ég hefði viljað heyra meira um leikskólann þó en það kemur kannski seinna

Fermingarveisla # 3 - frh.

Jæja þá er það veisla nr. 3 þetta árið.  Allt leit nú  þokkalega út þar sem veislan var á Selfossi og því ekki langt að fara.  En nei nei ekki aldeilis   Það var kominn snjór - ENN OG AFTUR!  Og jeppadruslan biluð.  Hvernig getur svo mikill snjór komið á svona stuttum tíma?????  Það er mér hulin ráðgáta en flygsurnar voru á stærð við golfkúlur eða tennisbolta, ja eða handbolta því þær voru svo stórar.  Og komu niður til jarðar gjörsamlega allllaaaan sunnudaginn.  Byrjaði reyndar aðeins á laugard.kv.  En jæja.  Ekki nennti ég að labba og ekki gat ég farið á reiðhjóli   Stebbi fór því út til að moka bílinn upp og best að taka það fram að ég á lítinn, rauðan, sætan bíl - en MJÖG lágan!  Jæja þegar hann var búinn að moka hann upp og sópa mestan snjóinn af honum reyndi hann að fara af stað  

Og hann sat fastur.  Ekki lengi þó því minn kraftakarl setti bara í Dræfið og ýtti bílnum upp.  Reyndi aftur.  Og hann sat fastur.  Aftur sama sagan.  Og í þriðja sinnið.  Svei mér þá ég hélt við kæmumst ekki í veisluna fyrir snjó í þetta skiptið.  En jæja, tengdó kom á Massanum og mokaði vel fyrir framan okkur og aftan og þá var bara brunað í gegnum snjóinn og gjörsamlega allt gefið í botn.  Og ég er að segja ykkur það að við vorum eins og á jarðýtu allan Vorsabæjarveginn (sem er 3 km. að lengd) því við ruddum bara veginn á Rauðhettu litlu og ég sat skíthrædd í framsætinu og ríghélt mér í handfangið og beið eftir að lenda ofan í skurði.  En við rétt náðum upp á Gaulv. veg sem var í mun betra ástandi   og komumst í veisluna, hálftíma of seint reyndar en betra er seint en aldrei ekki satt!?

Ég er fegin að ekki eru fleiri fermingarveislur þetta árið.  Vona bara að fólkið mitt komist klakklaust til okkar í afmæli Sigrúnar í byrjun maí

Svakalegir skýjahnoðrar

Þegar við Sigrún vorum á leið heim úr leikskólanum í gær sáum við þessa rosalegu skýjahnoðra á himninum og fljótlega sá ég nú hvað var um að vera.  Við ákváðum að taka rúnt þarna niðureftir og tókum myndavélina með.  Hérna sést hvernig þetta var um 5 leytið í gær       

Í gærkvöldi sáum við svo út um stofugluggann að Slökkviliðið var enn á staðnum um 10 leytið.  En það er gott að ekki fór verr því það mátti litlu muna miðað við það sem við sáum. 

Sinubruni við Lækjarbakka í Flóahreppi

Gleðifréttir

Loksins - já LOKSINS fékk ég hringingu frá augndeildinni á LSH og guess what!  Búið að kalla mig inn í aðgerð á hægra auganu   JIBBÍ  og nú er bara að vona að hún takist jafn vel og hin aðgerðin því rörið þar er svoleiðis að svínvirka að ég veit ekki hvað annað eins er   Mér stóð til boða að fara í aðgerðina núna næsta mánudag en ég varð eiginlega að afþakka þann dag og bað um 5.maí í staðinn því ég treysti því ekki að ég yrði búin að jafn mig alveg þegar kemur að Danmerkurferðinni.  Hún er fyrirhuguð aðeins 9 dögum síðar og ég vil ekki taka sénsinn á ef eitthvað kæmi uppá.  Enda get ég alveg beðið í 3 vikur í viðbót við biðina sem komin er nú þegar   Ritarinn sem ég talaði við taldi næstum öruggt að ég gæti frestað henni þar til 5.maí og nú er bara að krossa fingur. 

Geggjað ekki satt?  Nú sé ég fyrir mér að ég losni svo að segja alveg við bréfið og geti farið að lifa "eðlilegu" lífi... hvað sem það nú er!    

Farin að lesa og skrifa

Ég var að tala við mömmu í símann um daginn þegar dóttirin rétti mér blaðsnepil sem hún hafði skrifað þetta á:    Móðirin fylltist auðvitað stolti og rétti barninu símtólið. 

Hvernig lærði hún að skrifa svona alveg sjálf???  Svei mér þá.  Barnið er bara farið að lesa og skrifa.  Og ekki enn byrjuð í skóla. 

Ja ég er bara svo hissa