Gleðilegan skyr-dag

Hjá okkur í Vorsabæ er hinn svokallaði skyr-dagur í dag   þar sem við ætlum að hafa skyr í matinn í hádeginu.  Ok ok ég veit að það er skírdagur en okkur finnst bara þokkalega flott að hafa skyrdag líka.  Við fögnum bara báðum dögunum.

Ég fór í lyf í gær þar sem dagurinn í dag er rauður og allt er lokað.  Það gekk bara glimrandi vel og ég hef aldrei verið svona snögg í lyfjagjöf áður.  Ég hringdi á undan mér á göngudeildina þannig að lyfið var komið þegar ég mætti á svæðið.    Ég var kominn inn um 11.30 og búin kl. 12.15.  Það var tekin blóðprufa, lyfið sett strax upp og svo fékk ég solotex líka.  Þetta tók ekki nema 45 mínútur.  Ég hinkraði ekki einu sinni eftir niðurstöðunum úr blóðprufunni þannig að ég veit ekkert hvað ég var há í hvítu blóðkornunum eða neitt.   Já maður er bara orðinn temmilega kærulaus á þessu öllu saman.  Æ það er ágætt held ég.  Það skiptir reyndar ekki máli hvað ég er í hvítu varðandi þetta lyf því það hefur engin áhrif á þau.  Solotex er sprauta sem ég fæ 1x í mánuði og fæ ég hana til þess að fara á "breytingarskeyðið" þ.e. hún stoppar blæðingar.  Það er nauðsynlegt í mínu tilfelli þar sem ég var með hormónatengt krabbamein. 

Það getur vel verið að ég hafi verið búin að skýra frá þessu hér áður en það verður bara að hafa það   þar sem minnið mitt er orðið að gullfiskaminni.  Það tala margir um það sem fá krabbamein hvað minnið þeirra versni við það.  Það er sjálfsagt tengt áfallinu á einhvern hátt og þeim doða sem maður verður fyrir.  Maður verður líka allur einhvern veginn "meira út úr heiminum" ef þið skiljið hvað ég á við.   Æ ég skal hætta að bulla núna.

Við stefnum að því að taka lífinu rólega næstu daga og njóta þess að sofa út og horfa á barnaefni, fara í göngutúra, leika í kofanum, fara í matarboð, kíkja kannski í heimsóknir og svona.  Já er þetta ekki bara frekar rólegt?   Annars ætlar Stebbi nú að vinna "aðeins" þar sem hann fer að byrja á nýja húsinu í Brandshúsahverfinu hér í Gaulv.hr.  Hann er að grafa fyrir í dag og svo er stefnan að keyra í í dag eða á morgun.  Held að tengdó geri það.

Jæja þetta er orðið gott.  G O T T H!!!!  Læt fylgja með eina páskamynd af liljunni minni sem ég keypti í Blómavali og því segi ég bara...

  G L E Ð I L E G A   P Á S K A 

Let it be!

Fór á frábæra sýningu í gær í Hólmaröst (gamla frystihúsinu á Stokkseyri) og ég verð nú bara að segja það að ég skemmti mér frábærlega.  Þetta var hin besta sýning með svaka flottum söngvörum og leikurinn var það bara líka.  Að ógleymdum lögunum.  Þau eru náttúrlega algjört æði.  Já og ekki má gleyma hljómsveitinni... hún var líka góð.  Þarna var nú ein frænka mín í bakröddum og stóð hún sig nú bara vel blessunin.  Enda ekki við öðru að búast sko

Ég fékk nú bara smá "flashback" því það rifjaðist upp þegar ég var sjálf að taka þátt í leikritunum í FSu   he he... það var nú helvíti gaman.  OOooo í þá gömlu góðu daga þegar Ómar hafði hár... já og ég sjálf,  he he.     Ég var svo sem ekki með stór hlutverk... eitt sinn lék ég djöful sem dansaði eins og vitleysingur og í hitt skiptið einhverja kellingu sem sagði nú bara nokkrar setningar   En skemmtilegt var það o já já sei sei.  Kominn svefngalsi í mína núna bara

En hér eru aðeins 2 bílar á hlaðinu núna.  Búið að selja gamla hvít... já jeppann fína... BARNIÐ hans Stebba   smá táraflóð í kringum það svona... og svo er hann líka búinn að selja rauðu hættuna, þ.e. gamla vinnubílinn og það var nú bara ágætt.  Enginn grátur þar bara kátur hlátur.  Ja nema þú sért slátur, eeeeehhhhhhh.  Mín bara fyndin í dag, ha!!!!!

Held ég fari bara að sofa.  Góða nótt. 

Sunnudagur til sælu

Jæja góðan dag.  Maður bara farinn að blogga kl. 10 á sunnudegi.  Það er svona að eiga barn... maður fær nú ekki að sofa lengi út.  Svona er þetta... ég sef bara í ellinni ef mér leiðist þá   

Gleymdi alveg að segja ykkur frá fundinum sem ég fór á á þriðjudaginn síðasta.  Hann var á vegum Krafts og Dagbjört Lára sagði frá ráðstefnu sem hún fór á í Bandaríkjunum í febrúar.  Hún var um ungar konur og brjóstakrabbamein.   Það kom nú kannski ekki svo mjög margt nýtt í ljós... og þó.  Það var m.a. skýrt frá nýjungum í lyfjum og brjóstauppbyggingu.  Svo var einn fyrirlesturinn um tíðni krabbameins og óholls lífernis    Sem sagt mjög merkilegt allt saman.  Dabba sagði að þetta hefði verið svona pepp ráðstefna og lokaorðin hefðu verið eitthvað á þessa leið:  Örvæntið ekki - lausnin er innan seilingar.   Það veitir nú svo sem ekki af smá peppi um þessi mál af og til.  Allir gengu út fullir bjartsýni.  Og það drepur engann að vera bjartsýnn er það!!

Á föstudaginn fór ég til augnlæknis til að láta kíkja á þennan endalausa leka úr augunum.  Læknirinn tjáði mér að táragöngin væru alveg stífluð og þess vegna renna tárin náttúrlega bara út.  Hann reyndi að stinga á augun til að opna fyrir göngin en það var ekki að virka.  Hann var með frekar grófa nál til að stinga á... og þetta var frekar vont bara og hann sá þetta ekki almennilega við þessar aðstæður.  Þess vegna þarf ég að fara í smávægilega aðgerð.  Þá verð ég deifð og það verður skorið lítillega á augun, eða þar sem táragöngin eru til þess að víkka þau út eða opna þau aftur.  Þetta verður ekki fyrr en í lok apríl eða byrjun maí en það verður aldeilis gott ef það virkar.  Þá þarf ég ekki að eiga við þetta stanslausa rennsli meir.  HÚRRA HÚRRA

Heyrumst síðar krúttin mín    Bestu sunnudagskveðjur til ykkar allra.

Fyrsta prufa

Komiði sæl kæru vinir. 

Er að prufa að skipta um bloggstað.  Hef verið á blog.central.is en það er ekki hægt að setja inn myndir þar sem eru nú þegar í tölvunni.     Bara af netinu og það finnst mér stór galli.  Læt ykkur vita hvað gerist með þetta... hvort ég held hér áfram.

Ég er sammála þér Sandra með að þessi síða er skemmtilegri að mörgu leiti en það er meira mál að skrifa athugasemd   Ekki láta það samt stoppa ykkur frá því að kvitta.  Það eina sem þarf að gera í viðbót er að smella á tölvupóstinn sinn og staðfesta commentið þar.

 Bestu kveðjur

Rannveig   

Má til með að setja inn baðmynd af prinsessunni síðan í dag.  Hún fékk að vera í fríi frá leikskólanum í dag og skellti sér í bað með Kanarídúkkuna sína.