Sumarhátíð Krafts á morgun. Allir að mæta í fjörið.

Sumargrill stuðningsfélagsins Krafts 2007 verður á morgun fimmtudag 21. júní frá kl. 16:00 til 20:00 í Fjölskyldu- og húsdýragarðinum í Laugardal

Í ár vöndum við sérstaklega til verka og höldum hátíðina í Fjölskyldu-og húsdýragarðinum.  Frítt verður inn í garðinn frá klukkan 16:00 til 20:00 fyrir alla sem vilja, en selt í leiktæki.

Dagskráin verður mjög vegleg og hentar allri fjölskyldunni.  Kraftur gefur gestum grillaðar pylsur og gos auk þess sem veitingasala verður í garðinum eins og vanalega.

Dagskrá:
Hara systur frá Hveragerði kynna
Klukkan 17:00 Skoppa og Skrítla
Klukkan 17:30 Dýrin í hálsaskógi
Klukkan 18:30 Svitabandið
Klukkan 19:10 Skátar
Klukkan 20:00 lokar garðurinn

Allir velkomnir!

Kær kveðja
Stjórnin

Home sweet home

Jæja þá erum við komin heim úr ferðalaginu en við fórum norður á Akureyri á föstudaginn.  Umferðin gekk nú bara nokkuð vel norður.  Nokkrir bílar brunuðu nú framúr okkur en allt gekk þetta vel fyrir sig og við urðum ekki vör við nein slys eða beinlínis ofsaakstur.  Ja fyrir utan þónokkur bifhjól sem tóku framúr okkur á urrandi siglingu.  Ja þau hjól sem óku framúr okkur voru langt yfir löglegum hraða því við náðum að halda okkur á um 80-90 nánast alla ferðina.   

En hvað um það.  Við vorum komin norður um 9 leytið á föstudagskvöldið og fórum á tjaldsvæðið að Hömrum.  Fundum þetta fína svæði hjá Kollu og Steinari (ásamt börnunum 2 og einum hundi).  Við tjölduðum nálægt fínni tjörn þarna með nokkrum hjólabátum á og einum góðum árabát.  Fleiri ferðalangar bættust smátt og smátt í hópinn okkar á föstudagskvöldið og vorum við alls með 2 fellihýsi, 2 tjaldvagna og einn  húsbíl   samtals voru hundarnir 3 í tjaldbúðum okkar og höfðu börnin sérstaklega gaman af þeim. 

Laugardagurinn rann upp bjartur og fagur og það var algjör rjómablíða allan daginn.  Við kíktum í göngutúr um svæðið ásamt því að slappa vel af eins og maður Á að gera í útilegum   og seinni partinn kíktum við litla fjölskyldan á Ragnheiði og Tómas (frændfólk bóndans) og þar sofnaði skvísan mikið þreytt eftir mikla útiveru og hamagang. 

Grilluðum okkur lax um kvöldið og sátum langt frameftir í kyrrðinni.  Já ég segi kyrrðinni því við urðum ekki vör við þessi ólæti sem áttu að hafa verið þarna á svæðinu   Unglingasvæðið var að vísu spöl frá okkur og við heyrðum svo sem í tónlist og svoleiðis en ekkert til að tala um.  

Tókum svo saman um hádegisbilið á sunnudag og fórum suður Kjöl.  Hann var ágætur en maður fer nú ekki hratt yfir með fellihýsi aftan í   Við komum við í bústaðnum hjá mömmu og pabba á leiðinni heim og fengum aftur grillaðan lax  voðalega gott.  Langt ferðalag fyrir stuttan tíma þannig að það voru þreyttir ferðalangar sem skriðu uppí rúm í gærkvöldi   Læt fylgja með nokkrar myndir að gamni úr ferðinni.

             

Hæ hó jibbí jei og jibbí jei...

Eigið góðan og gleðilegan Þjóðhátíðardag og munið nú að syngja hátt og skýrt...

17. JÚNÍ

Blóminn springa út og þau svelgja í sig sól,
sumarið í algleymi og hálft ár enn í jól.
Í hjarta sínu fólkið gleðst og syngur lítið lag,
því lýðveldið Ísland á afmæli í dag.

:,: Hæ, hó, jibbí, jei og jibbí, jei,
það er kominn 17. júní. :,:

Jóni heitnum Sigurðsyni færir forsetinn,
firnamikinn árvissan og stóran blómsveiginn.
Fjallkonan í múnderingu prílar upp á pall,
með prjáli les upp ljóð, eftir löngu dauðan kall.
(pent hún les upp ljóð, eftir löngu dauðan kall. )

:,: Hæ, hó, jibbí, jei og jibbí, jei,
það er kominn 17. júní. :,:

Skrúðgöngurnar þramma undir lúðrasveitarleik,
lítil börn með blöðrur, hin eldri snafs og reyk.
Síðan líður dagurinn við hátíðannahöld,
heitar étnar pylsurnar við fjölmörg sölutjöld.

:,: Hæ, hó, jibbí, jei og jibbí, jei,
það er kominn 17. júní. :,:

Um kvöldið eru allsstaðar útidansleikir,
að sunnan koma rándýrir skemmtikraftarnir.
En rigningin bindur enda á þetta gleðigeim,
því gáttir opnast himins og allir fara heim.

:,: Hæ, hó, jibbí, jei og jibbí, jei,
það er kominn 17. júní. :,:

Höfundur texta: Bjartmar Hannesson
Höfundur lags: Haukur Ingibergsson

Fyrsta ferðin

Já við fórum í fyrstu útileguna þetta sumarið til REYKJAVÍKUR       Hver hefði trúað því að við sveitalubbarnir myndum fara í útilegu þangað...???  En við vorum sem sagt að hjálpa systur minni að rýma húsið sitt og vorum að því langt frameftir laugardeginum og það var búið að lofa prinsessunni á bænum að fara í útilegu um helgina þannig að við slóum bara 2 flugur í einu höggi og skelltum okkur í útilegu í Laugardalnum.  Og þar er náttúrlega hin besta aðstaða og veðrið var yndislegt og við sváfum bara vel okkar fyrstu nótt í fellihýsinu   Við Sigrún tókum hálftíma rölt um "gamla hverfið mitt" í morgun á meðan húsbóndinn lagði sig aftur.         

Svo ákváðum við að skella okkur í Húsdýragarðinn þar sem ferðin um daginn var hálf misheppnuð.  Sigrún vildi nú bara vera í hringekjunni og lestinni allan tímann og var slétt sama um þessi dýr þarna   enda alvön alls kyns dýrum sveitastelpan.  En svo vildi hún fara í stóra fallturninn (stór á mælikvarða fyrir 5 ára barn) sem hún suðaði EKKI LÍTIÐ um þarna um daginn þegar M 12 dagurinn var.  Og jú hún fékk að fara í hann en var nú samt um 10 cm lægri en viðmiðið er í þetta tæki.  Starfsstúlkan spurði mig hvort ég myndi treysta henni í þetta þannig að ég spurði Sigrúnu aftur og aftur hvort hún vildi virkilega fara í þetta ógnartæki    Já hún hélt það nú og þannig var það.  Hún skellti sér í eitt sætið með "hinum" unglingunum (því það voru bara unglingar í tækinu og svo hún) og sætin (sem eru utan á turninum) byrjuðu að færast upp.  Svo fóru þau ofar og ofar og allt í einu "féllu" þau niður á ógnarhraða og þá kom nú frekar mikill skelfingarsvipur á mína   en turninn hélt áfram nokkrum sinnum upp og niður og þegar þetta var búið spurðum við Stebbi hana hvort þetta hafi verið gaman...  "neeee ekki mjög.  Ég var soldið hrædd" sagði hún en fór þó ekki að skæla.  Hún kvaðst bara aldrei vilja fara aftur í þennan turn því hún hafi nú verið dáldið hrædd sko.  Þá er bara búið að prufa hann og varla verður suðað aftur um að fá fara í þetta tæki aftur  

Allt að verða klárt

Jæja þá er ég búin að margþræða helstu búðir á Selfossi sem gætu selt útileguvörur og það er ekki auðvelt að finna það sem mig vantar.  Í einni ónefndri byggingavöruverslun sem ætti nú reyndar að vera búið að loka fyrir löngu fyrir lélega þjónustu (en það er önnur saga) þar var bara ekkert til nema samansafn af afgöngum síðan í fyrra og starfsmaðurinn sem ég talaði við sagðist bara EKKERT vita hvort það kæmi eitthvað nýtt inn   Í einni lágvöruverslun var heldur ekkert til nema pikknikk körfur og plastskálar.  Þannig að út fór ég enn eina ferðina þaðan án þess að finna neitt.  Svo fór ég á aðalstaðinn   og viti menn.  Fann þessar líka fínu vörur til að setja í nýja fellihýsið mitt.  Pikknikk-pakka með könnu, glösum, dúk, diskum, hnífapörum, bakka undir herlegheitin og meira að segja rör með   Nú svo fann ég líka plastskálar í mismunandi stærðum (fyrir afgangana auðvitað og salötin) og kassa fyrir brauðmeti, hrökkbrauð og solleiss.  Já það má bara ekkert vanta og ég nenni ekki að hafa þetta allt í plastpokum út um allt hús skiljiði   Þannig að ég er hreinlega að verða klár í útilegurnar.  Hhmm ég ætla nú ekki að uppljóstra því hvert við erum að spá í að fara um næstu helgi   ég held að enginn venjulegur Íslendingur fari þangað í tjaldútilegu  

Knús á línuna eins og Ásta Lovísa hefði sagt.  Blessuð sé minning hennar.

Kominn júní

    Pæliði í því.  Það er kominn JÚNÍ!!!   Sumarið verður búið áður en maður nær að snúa sér við.  Við ætlum nú að reyna að skella okkur í nokkrar útilegur í sumar.  Það sem er "defenetlí" ákveðið er fjölskylduútilega í Borgarfirði um miðjan júlí en allt fólkið okkar kemur frá Noregi.  Það verður gaman að hitta þau öll.  Nína, Kjell, Gunn Vigdis, Helen og Harald og öll börnin maður vá.  Frábært alveg.  Ætlum svo að halda áfram norður og austur á land í einhverja daga.  Svo stefnum við á Úlfljótsvatn, Laugarás og Þingvelli jafnvel... eina nótt kannski því ekki nennir maður að vera lengi á stað þar sem ekki má heyrast í manni eftir 10 á kvöldin   ég meina come on!  Börnin eru nú úti að leika langt frameftir á tjaldsvæðum um hásumarið.  Mér skilst allavega að á Þingvöllum verði að vera komin ró á liðið kl. 22.00  TAKK FYRIR!  Sjáum til hvað við gerum.

Reykingabannið á skemmtistöðum hefst á morgun.  Gott mál það.  En það verður nú gaman að sjá hvort blindfullir Íslendingar (og aðrir of course) fari eftir þessu.  Það verða nú örugglega einhverjir úti í horni að reyna að "laumast" til að kveikja sér í og segja svo bara:  "Haaa?  Bannað að reykja?  Hva segirrrru?  Errrrt a meinedda?  Jiiii ég vissi þakki sko!!!"      

 

Óskum eftir ferðafélögum í útilegur í sumar 

Hvítasunnuhelgin afstaðin

Jæja margt búið að gera um helgina.  Ber helst að nefna að á föstudaginn var opið hús hjá okkur í Krakkaborg og sungum við í kórnum okkar með Hörpukórnum (eldri borgarar) í Þingborg og tókst það ljómandi vel.  Við vorum ansi stolt af hópnum okkar og þau stóðu sig svo vel. 

Um kvöldið fórum við svo í Timburhól (skógarlundurinn rétt hjá afleggjaranum heim til okkar) því þar var búið að kveikja í kolum og kom hópur saman til að grilla og hafa gaman.  Leikhópurinn í Flóahreppi sýndi svo frumsamið verk sem var assgoti gott.  Sigrún hitti m.a. Kolbrúnu Kötlu vinkonu sína úr leikskólanum. 

Laugardagurinn var nú nokkuð fljótur að líða hér á bæ þar sem húsmóðirin stóð sveitt í eldhúsinu eitthvað að fást við mat.  Gerði 2 stórar brauðtertur fyrir fermingu Þuríðar sem var svo í gær.  Afrakstur svitans má svo sjá hér   agalega fínar og voru hinar bestu á bragðið.  Sigrún og Stebbi skelltu sér í Töfragarðinn á meðan.

Nú svo brunuðum við til Reykjavíkur snemma á Hvítasunnudag til að mæta í Langholtskirkju þar sem fermingin fór fram.  Þuríður stóð sig eins og hetja og var auðvitað langflottust.  Sigrún var nú ekki alveg að nenna þessu og spurði sífellt hvenær þetta væri búið því þetta væri svooooo leiðinlegt!!!    Hún reyndi nú að drepa tímann þessi elska með því að tóna með prestinum og fara 2x á klósettið og svona.    Svo fórum við í veisluna og fengum þennan líka æææææðislega mat, bland af hinum og þessum réttum og sælkeratertur auðvitað   Þetta var voða gaman og svo eftir veisluna ákváðum við litla fjölskyldan að bruna í Skorradalinn að heimsækja Svövu og co í sumarbústað.  Það var alveg frábært.  Meiriháttar staður alveg, bústaðurinn er nálægt vatninu og svo skógurinn og fjöllin í kring.  Sigrún, Reynir og Ísak (frændi Reynis) nutu sín úti í náttúrunni og kallarnir okkar Svövu fóru á seglbát út á vatnið.  Voða gaman.  Svo keyrðum við Hvalfjörðinn heim og fórum Þingvallamegin.

Nú í dag opnuðum við svo fellihýsið loksins og erum við búin að stúdera allt í sambandi við uppsetninguna á því.   Ég er voða spennt að fara í fyrstu útileguna og prufa græjuna.  Sigrún vill nú bara sofa þarna úti í nótt   Hún skellti sér inn og náði í köku sem hún vildi nú endilega borða í fellihýsinu þannig að fyrsta kökumáltíðin er afstaðin í þessu líka fína húsi           Það eru komnar nokkrar nýjar myndir inn í albúm merkt sumar 2007 hér neðar á síðunni.  Einnig eru nýjar myndir á heimasíðu Sigrúnar  http://barnanet.is/sigrunstef

Rok, rok ég ræ ekki

Þetta er nú meira hel... rokið hérna á þessu skeri.  Maður bara nær ekki andanum í þessu.  Púff.  Fékk bílhurðina í andlitið áðan á meðan ég var að hleypa Sigrúnu út.  Svei mér þá.  Ef ég hefði nú fengið marblett eftir hana þá hefði nú einhver haldið að um heimilisofbeldi væri að ræða.  Maður rétt búinn að jafna sig eftir augnaðgerð... en já talandi um augnaðgerð.  Rörið fína poppaði nú bara upp úr hjá mér á sunnudaginn síðasta þannig að nú er ég röralaus og ekki hægt að kalla mig Lester Jones lengur   Þannig að ég þurfti enn og aftur að hitta Harald augnlækni á miðvikudaginn og hann sagði að næsta skref væri að prufa aðra týpu.  Já þetta var einfaldlega ekki mín týpa   en hann vill bíða með það fram á haustið.  Leyfa bólgunni alveg að hjaðna og auganu að jafna sig og sonna.  Gott að það sé alveg búið að lagast þegar á að fara að þjösnast á því á nýjan leik.  Þetta er nú meira ástandið.  En ok.  Ég verð að sætta mig við það að tárast í sumar og mega svo búast við aðgerð á ný upp úr miðjum ágúst.  Great!!!  Eins gott að þetta virki þá.  Spurning um að fá lengra rör næst því þau eru víst til mislöng.

Annars lítið títt af þessum bæ.  Fjör í Flóanum um helgina og ætlum við fjölskyldan að reyna að taka aðeins þátt í því á milli þess sem ég smyr á brauðtertur fyrir fermingu Þuríðar sem er á Hvítasunnudag.  Var að panta brauðin áðan og þá er bara að skella í salatið á morgun.  Smyrja svo á laugardag.  Skreyta á sunnudag.  Ekki gott plan???   

Heyrumst.

Candy floss sumarið mikla, úffff!

Við Sigrún skunduðum til Reykjavíkur í dag.  Byrjuðum á því að hitta Sibbu söst í Kringlunni.  Sigrún fór í Ævintýraland og skemmti sér konunglega.  Við Sibba áttum erindi í búð í Kringlunni.  Segi ekki meir þar sem sumir gætu verið að lesa   Þegar það var búið fengum við okkur kaffi og með'ðí á Kaffi tár.  Mmmmmm besta kaffið í heimi   Svo náðum við í Sigrúnu og hún fékk pizzu og brauðstangir frá Dominos á Stjörnutorgi. 

Svo kvöddum við Sibbu og brunuðum í Fjölskyldugarðinn á M 12 hátíð.  OG JE MINN EINI.  Þvílíkt og annað eins kraðak af fólki.  Ég sleppti varla hendinni af Sigrúnu því það hefði EKKI verið auðvelt að finna hana aftur í mannmergðinni.  Við urðum nú fyrir svolitlum vonbrigðum með þennan dag.  Það var ægileg eftirvænting í Sigrúnu fyrir þennan dag því hún ætlaði sko í hringekjuna og í hoppukastala og að sjá Skoppu og Skrítlu.  Sem henni finnst by the way ÆÐISLEGAR.  Nú biðraðirnar í tækin voru tugi metra að lengd og það tæki sem heillaði mest hjá henni mátti hún ekki fara í því hún var ekki nógu há   Þá var aðeins grátið.  Svo hún fór þá á risa hoppudýnu þar sem sást nú varla í dýnuna fyrir krökkum.  En hún prófaði og staldraði nú stutt við.  Hún hoppaði og skoppaði upp í loftið og vildi bara koma af.  Pínu meiri grátur   Aðeins of margir STÓRIR krakkar.  En jæja þá hófst leitin að Skoppu og Skrítlu.  Við spurðum örugglega 10 starfsmenn (krakka BTW) hvar þær ættu að vera en enginn vissi neitt.  "eeee sko ég held þær verði á sviðinu sem er einhvers staðar þarna" og bentu út í loftið.  Annar sagði að þær yrðu hjá Víkingaskipinu.  Enn einn sagðist bara ekki vita það sko... "ég bara vinn hérna"  Oh my god!!!  Þvílík hjálp sem var í þessu liði.  Við gengum fram og til baka í garðinum þangað til við runnum bara á hljóðið í þeim og þá var mikil gleði að finna þær.  Sigrún fór auðvitað fremst við sviðið (en ekki hvað!!!  Hefur góða fyrirmynd  ) og hlustaði á þær syngja af miklum áhuga.  Svo þegar þær voru búnar með showið hófst myndataka með öllum börnunum.  Við lentum nú frekar framanlega í því þannig að ég skelli inn myndum af því við tækifæri.  Glaðar héldum við ferð okkar áfram um garðinn og ákváðum að fara í Candy floss röðina.  Og je minn eini.  Biðum í klukkutíma í röð þar til við gáfumst upp.  Við ákváðum að fara bara á einhvern annan stað til að reyna að finna þetta Candy floss því það kom ekki til greina að kaupa eitthvað annað í staðinn.  Candy floss skyldi það vera   En jæja þá fórum við bara aftur í bílinn og heyrðum í Stebba og hann var þá akkúrat kominn í bæinn af Landsþingi Landsbjargar sem var á Suðurnesjunum.  Við ákváðum að skella okkur í Kolaportið því ég hafði hlerað það í Fjölsk.garðinum að það fengist Candy floss þar.  Og jú jú við fundum það og þá var nú kátt í höllinni   Og við fundum líka harðfisk og nammi og þá fóru allir glaðir heim.

Jú dagurinn var bara nokkuð góður í heildina séð og Sigrún hæstánægð þegar öllu var á botninn hvolft  

Góða nótt   

Enn smá von

Fór til augnlæknisins í dag í "check up" og hann sagði að augað væri ekki enn búið að jafna sig eftir aðgerðina og því væri enn von um að táragöngin ættu eftir að virka betur.  Það er enn bólga í þessu þannig að nú er bara að bíða og sjá.  Hann vill hitta mig aftur í haust til að sjá þá betur hvernig þetta virkar í raun og þá getur hann betur metið hvort borgi sig að reyna við hitt augað.  Já þá er bara að krossa fingur og vona það besta   Ég er sem sagt ennþá að þurrka úr auganu en finn þó nokkurn mun.  Þurrka orðið oftar úr hægra auganu núna.  Æ ég veit ekki... þetta kemur bara í ljós.

Fór svo aftur í bæinn í dag í afmæli hjá "litlu" frænku minni sem varð 14 ára í dag   Já hún Þuríður er orðin 14 og mun fermast á Hvítasunnudag.  Ja hérna hér.  14 ára já.  Sumarið 1988...  nokkur stikkorð fyrir ykkur sem þekkið mig og vitið hvað þau þýða, malbikun, skólinn, Rannveig - your mother, kúlutjald, sætaferðir, Fiat uno... segi ekki meir!!!    

Stefni á garðvinnu á morgun.  Prrrrrrrrrrrrrrrrrr  yfir og út!