Ein ég sit og sauma...

... inni í litlu húsi, enginn kemur að sjá mig nema litla músin... eða nei kötturinn hefur náð henni

Sigrún lööööngu sofnuð, ég sit hér ein og sauma tölu á buxur bóndans í nýju stígvélunum mínum   Bóndinn á bænum er á 20 ára gagnfræðingamóti og þar er örugglega mikið stuð.  Ég var að enda við að horfa á heilmikla spennumynd á RÚV með Cruise.  Helvíti góður alltaf og lék skúrkinn assgoti vel.  Ég var komin með hækkun á blóðþrýsting í lokin bara

Við mæðgur fórum í Brúarhlaupið í dag með mömmu.  Skelltum okkur í skemmtiskokkið (2,5 km) og sú stutta ætlaði nú að gefast upp áður en við náðum yfir brúna til að stilla okkur upp í startið   Við örkuðum af stað, skokkuðum aðeins og strunsuðum inn á milli og hún gat þetta á endanum og restaði á að stinga mig af þegar hún hljóp í markið.  Hún fékk einhvern ofurkraft þegar hvatningarópin byrjuðu að óma á Bankaveginum og hún brunaði í markið og fékk verðlaunapeninginn sinn.   Sú var stolt og ánægð en vá hvað hún var þreytt.  Hún var sofnuð um 9 leytið í kvöld og það múkkaði ekki í henni.   Held hún hafi ekki sofnað svona snemma síðan hún var ófiðraður ungi  

Reykjavíkurferð á morgun.  Ætla nú að láta það eiga sig að fara í styrktargönguna en er samt búin að styrkja málefnið um 3.000 kall.  Fer kannski næst   Sexurnar eru að hittast í bröns heimá hjá einni sem var að flytja upp í Mosó.  Ætlum að kíkja á slotið hennar og slúðra dálítið og éta á okkur gat!

Styrktarganga fyrir brjóstakrabbameinsrannsóknir

STÓRA STYRKTARGANGAN 2008 VERÐUR ÞANN 7. SEPTEMBER

Elliðaárdalur, Reykjavík: kl. 10:30 frá Árbæjarkirkju

Gengið verður um Elliðaárdal og kostar 3000,- kr.  Hægt er að fara 3, 7 og 10 km. 

Einn helsti tilgangur Göngum saman er að styrkja grunnrannsóknir á krabbameini í brjóstum. Fyrsta styrkveiting Göngum saman fór fram 22. október 2007.  Hægt er að sjá meira um málið á http://gongumsaman.is

Ég er búin að skrá mig í gönguna en er ekki enn búin að ákveða hversu langt ég geng   Kemur einhver með?

Aldeilis gott framtak

Það mættu vera fleiri fréttir af þessum toga í íslensku samfélagi.  Frábært framtak og miklu fargi létt af bóndanum sem sá líklega ekki fram á að geta haldið búrekstri áfram. 

Meira svona

Þetta er eins og að fá fæturna aftur

Skólastelpan í kirkju

Jamm við fórum í kirkju á sunnudaginn.  Séra Úlfar er að hætta hér sem prestur og var með síðustu messuna sína á sunnudaginn og svo var kaffiboð í Félagslundi á eftir.  Sigrún var nú ekki að fíla þessa messu get ég sagt  ykkur.    "Æi mamma þetta er alveg HUND-leiðinlegt(með tilheyrandi svipbrygðum).  Ég get ekkert gert hérna og kann ekkert þessi lög (sálmana) og get ekki sungið með... hvenæææær er þetta búiiiið???"  Ég held að næsta skipti sem þessi unga dama fer í kirkju verði í kringum fermingarfræðsluna  

Annars var þetta fínt en messan var líka í það lengsta því það var gengið til altaris og ekki var það nú til að bæta þolinmæðina hjá þeirri stuttu.  Fórum svo í Félagslund og fengum okkur kaffi og meððí og þar hitti Sigrún nokkra vini úr leikskólanum og skemmti sér vel þannig að ferðin var ekki alveg til ónýtis fyrir hana  

En hún er mjög áhugasöm í skólanum og les nú heima á hverjum degi í bók sem heitir Unugata.  Hún verður svo í fimleikum í vetur líka og ég held það sé ágætt að hún fái að sprikla svolítið því orkuna hefur hún svo sannarlega.  En ég hef ekki verið svona fljót að vekja barnið í laaaangan tíma svo hún er ansi spennt að fara í skólann á hverjum degi   Vona bara að það haldist lengi út.

Vil minna á að ÁTAKIÐ er hafið að nýju

Þegar vindáttin breytist reisa sumir sér skjólveggi en aðrir byggja sér vindmyllur!

Þetta spakmæli er kínverskt og þegar ég var í krabbameinsmeðferðinni (vikulegu lyfjagjöfunum í 11 vikur) þá fórum við Stebbi á námskeið sem heitir "að lifa með krabbamein."  Í lok hvers tíma fengum við alltaf einhver góð spakmæli sem er ágætt að hafa til hliðsjónar þegar erfiðleikar steðja að.

Ég var að fletta möppunni með öllum efniviðnum sem við fengum á námskeiðinu og vá þvílkt safn af alls kyns fróðleik.  Það var ekki séns fyrir mig að lesa þetta allt saman á þeim tíma sem við vorum þarna því þegar líða tók á námskeiðið leið mér orðið svo illa að ég gat varla mætt í tímana.  Eins og einhverjir lesendur hér muna kannski þá var mér orðið ansi óglatt í lokin ásamt því að vera með munnangur eða sár um allan munn þannig að erfitt var fyrir mig að borða og þrekið var hreinlega ekki neitt   Mér finnst pínu erfitt að rifja þennan tíma upp núna enda margt vatn runnið til sjávar síðan. 

Í lyfjagjöfunum kynntist ég mörgu góðu fólki, bæði hjúkrunarfólki, læknum og svo þónokkrum sjúklingum.  Mig langar að skrifa svo margt hér en læt það vera því það eru margir sjúklingarnir horfnir á braut og mér finnst hvert áfallið á fætur öðru hafa komið upp á þessum rúmum þremur árum sem er liðið síðan ég greindist.  Ég sit hér með tárin í augunum og rifja þetta upp en einmitt ein ágætis kona sem ég kynntist á göngudeildinni kom í viðtali í Vikunni í okt.2005 og í því viðtali var hún svo glöð að vera búin í lyfjagjöf og hélt hún ætti lífið framundan.  Þegar þetta blað kom svo út þá sat hún með það í næstu lyfjagjöf því hún hafði greinst aftur   Og nú er hún látin blessunin.  Svo sorglegt og ósanngjarnt! 

Munum að lifa í núinu og njóta hvers dags því enginn veit hvað gerist á morgun. 

Da dam da damm... da dam da damm...

  Við hjónin eigum 2 ára brúðkaupsafmæli í dag   sem er hreint alveg ótrúlegt.  Mér finnst eins og það hafi gerst í gær     Set inn nokkrar myndir úr brúðkaupinu til upprifjunar.  Djö... var gaman maður        

              Smellið á myndirnar ef þið viljið sjá þær stærri.

Annars gekk fyrsti skóladagurinn vel hjá Sigrúnu og hún er voða spennt fyrir þessu öllu núna.  Hlakkar til að fara í heimilisfræði enda heitir kennarinn Sigrún   Hún var nú móðguðust yfir því að fá ekki að fara heim með skólabílnum því hún var í skólavistun eftir skóla og þurfti ég því að sækja hana.  Hún var stolt af því að geta skorið fiskibollurnar og kartöflurnar alveg sjálf í hádeginu og þurfti enga hjálp   Já þau eru mörg verkefnin sem þarf að glíma við. 

Landbúnaðarsýningin á Hellu

Við hjónin drifum okkur á föstudaginn með einkabarnið á Landbúnaðarsýninguna á Hellu með fellihýsið aftaní.  Fórum með Kollu og Steinari og börnum þeirra og það var grenjandi rigning og hífandi rok en við létum það ekki aftra okkur því við tókum ákvörðun um það snemma í vor að á Landbúnaðarsýninguna skyldum við fara.  Og sjáum ekki eftir því að hafa drifið okkur.  Þetta tókst allt með ágætum, fengum að sjá ný tæki og tól í landbúnaðinum, fengum að smakka á hinum ýmsu kræsingum eins og nýju og brakandi grænmeti, Krakkaskyri og ýmsum ostategundum, Þykkvabæjarsnakki, hráu hrossakjöti í soyasósu með wasabi sesamfræjum, nautakjöti sem var heilsteikt á teini og ég veit ekki hvað og hvað.  Allt hið mesta hnossgæti og svo auðvitað kaffi og súkkulaði á öllum sýningarbásum

Við fórum um allt svæðið nokkrum sinnum og skoðuðum íslensku hænurnar og kusum fallegustu hænuna og fallegasta hanann.  Það var ekki létt verk   svo fór Sigrún á hestbak  fór í hoppukastala, fékk fullt af blöðrum og ýmsu góðgæti, söng með Ingó  fékk að halda á hvolpum   og ýmislegt fleira skemmtilegt.    Við sáum líka þegar kind var rúin og skoðuðum gamlar heyvinnuvélar og fleira og fleira.  Svo fórum við á kvöldvökuna á laugardagskvöldið þar sem m.a. Álftagerðisbræður sungu af sinni alkunnu snilld, Guðni Ág. hélt þrusugóða ræðu, Gísli Einarsson kynnti atriðin og fór með gamanmál, Ingó og Veðurguðirnir náðu upp brjálaðri stemningu og Sigrún vildi nú endilega fara nær þannig að pabbi hennar labbaði með hana á háhest að sviðinu og þar settist skvísan hjá Ingibjörgu vinkonu sinni og þær sungu og skemmtu sér vel.  Skemmtilegast að vera við sviðið því þar er mesta stemningin   Hvaðan skildi hún hafa það blessunin???    Nú nú nema hvað.  Árni Johnsen slúttaði kvöldvökunni með kartöflugörðunum heima og svo fór nú fólkið að týnast heim.  Að lokum var flott flugeldasýning og það voru þreyttir tjaldgestir sem fóru að sofa um kvöldið og voru ekki lengi að sofna.   

Hin flottasta sýning að mínu mati en mér fannst þeir klikka á einu atriði.  Og það var að ekki var hægt að kaupa grænmeti, snakk og nýja skyrið á staðnum.  Við hefðum viljað geta keypt það sem við vorum að smakka á en það var ekki hægt   Vonandi verður bætt úr því næst   Allt annað hið besta mál og ég þakka fyrir mig og mína

Skólinn er að byrja hjá Sigrúnu á morgun og það er búið að fjárfesta í bleikri skólatösku(æi já já mamma, keyptu bara eitthvað), blárri möppu og bláu pennaveski (bleiki liturinn er loksins aðeins á undanhaldi) og nú kemur í ljós hvernig þetta á eftir að ganga allt saman.    Hún hefur ekkert verið neitt sérlega spennt en svo verður þetta örugglega voðalega gaman allt saman.

Læknaferð... og Episode 2

Fór í gær í mitt hefðbundna eftirlit sem er á þriggja mánaðar fresti.  Ég byrjaði á að fara í hina árlegu brjóstamyndatöku á leitarstöðinni og hitti Sibbu systir þar.  Fékk nett flashback því hún var einmitt með mér fyrir 3 árum síðan þegar ég fékk fyrsta sjokkið   En ég var mynduð í nýja flotta tækinu þar og svo lá leiðin niður á landsa og ég fór í blóðprufur og hjartaómun.  Stungan gekk vel að þessu sinni og þurfti aðeins eina stungu núna.  Stundum eru þær þrjár en þetta slapp vel, fjúff.  Er orðin nett leið á því þegar ekki finnast æðar í mér og þá þarf að stinga aftur. 

Hjartaómunin gekk vel og konan sem ómaði mig sagði að ég væri með gott og sterkt hjarta   Hún sagði einnig að þær konur sem hún hefur verið að óma undanfarið og hafi fengið brjóstakrabbamein eru langoftast með meinið í vinstra brjósti.  Ein á móti 20-30 talaði hún um.  Það er nefninlega erfiðara að óma á örinu eftir skurðinn og því hefur hún tekið sérstaklega eftir þessu

En ég fór svo inn í lyf og fékk Zolotexið og beinalyfið núna en seinna lyfið þarf ég aðeins að fá 2x á ári því beinin mín virðast vera í fínu lagi   Ég er dugleg að taka lýsi og kalk og svo borða ég mjólkurmat líka þannig að vonandi held ég áfram að vera góð í bein-mælingu.

Óskar sagði mér ýmislegt í viðtalinu í gær sem ég nenni nú ekki að tíunda hér en mergur málsins er sá að enginn veit sína ævina fyrr en öll er og við það situr!  Nenni ekki að fara að lifa í einhverju ef-i því hver er þá tilgangur lífsins???  Ég bara spyr   Auðvitað get ég greinst aftur og ég er í ákveðnum áhættuhóp og allt það en ég er bara ekki týpan í að velta mér upp úr því.  Ég ætla að njóta lífsins og tek einn dag í einu.  Og þakka Guði fyrir það að ég vakna hress á hverjum degi og er til í tuskið

En nóg um það.  Nú kemur aðalstöffið... ég fór í Ráðhús Árborgar í dag til að taka við verðlaunum fyrir nafngiftina á nýja leikskólann í Árborg (sem hann Einar Magni stórvinur minn og félagar smíðuðu).  Ég mætti þarna með Sigrúnu með mér og hitti leikskólafulltrúann, formann leikskólanefndar og blaðamenn og ég veit ekki hvað   Fékk voða fínan blómvönd og pening að gjöf sem ég er afar þakklát fyrir.  Frábært framtak að hafa svona samkeppni (og ég tala nú ekki um fyrst maður vinnur hana HAHA).  Það bárust hugmyndir frá 39 aðilum og nöfnin voru 29 (sumir með sama nafnið) en ég var víst sú eina sem datt nafnið Jötunheimar í hug   Getið væntanlega séð fréttaklausu um málið í næsta Sunnlenska og Suðurglugga.  Já svona fór um sjóferð þá!

En helgin framundan og Landbúnaðarsýningin og allt að gerast.  Sjáumst

Allt að gerast hérna...

Já það er margt um að vera þessa dagana.  Er að fara á morgun í hið hefðbundna eftirlit til Óskars (Hr.Krabba) og fer í leiðinni í brjóstamyndatöku og hjartalínurit.  Það þarf að tékka reglulega á þessum hlutum hvort ekki sé allt með eðlilegum hætti.  Ef maður getur talist eðlilegur á einhvern hátt   Ætla að hitta Sibbu söst og við kíkjum örugglega á einn af aðalstöðunum sem við fórum alltaf á fyrir 3 árum sem er náttúrlega Á næstu grösum.  Fáum okkur auðvitað kaffi og heilsuköku

Svo var ég að byrja á mjög spennandi námskeiði í kvöld sem mér líst ljómandi vel á.  Fjalla kannski nánar um það á "átaksblogginu" því nú fer það aftur í gang.  Þú manst lykilorðið er þakki?   Já það er sko allt að gerast....

Nú svo er það aðalmálið maður..... sem ég segi ekki frá að svo stöddu   Þú verður að fylgjast vel með ef þú vilt vita það en það snýst að vissu leyti um leikskólamál.... og ..... nei ég segi ekki meir!!!

So if you want to see more from next episode you have to stay tuned for more details. 

TO BE CONTINUED... 

Tæpur á því...

Óskar var besti kosturinn í stöðunni

Sjálfstæpisflokkurinn og Framsóknarflokkurinn hafa náð samkomulagi um meiirhlutasamstarf í Reykjavíkurborg. Frá þessu va... 

Svona var fréttin á visi.is og má kannski segja að þetta sé einmitt málið   Frekar tæpur á því þessa dagana blessaður flokkurinn.

Væri ekki ráð að vanda sig betur við fréttirnar á vefnum í stað þess að rembast eins og rjúpan við staurinn við að vera fyrstur með fréttirnar?! 

Bara svona pæling