Hvaðan koma þessi svör???

Sit hér agndofa yfir svörum dóttur minnar   Við vorum að skoða tölvupóstinn minn og þar sá hún mynd af 2 börnum frá SOS  - Barnaþorpum og spurði hvaða börn þetta væru og ég sagði henni að þessi börn væru munaðarlaus og ættu ekki heima hjá mömmu sinni og pabba.  Ég sagði henni að sum börn úti í heimi fengju lítið eða ekkert að borða.  "Æ hvað það er nú sorglegt" sagði hún eftir langa umhugsun.  "Eru þau þá alltaf svöng?"

Þessi mynd fékk mig til að hugsa alvarlega um að styrkja eitt barn hjá barnaþorpunum.  Það kostar 2300 kr. á mán. að gerast styrktarforeldri og þá fær maður mynd af barninu og upplýsingar reglulega um barnið sem maður styrkir.  Fær að fylgjast með þroska þess og svoleiðis og mér finnst þetta hljóma mjög spennandi.  Manni líður líka svo vel í sálinni vitandi að maður getur skipt sköpum fyrir þó ekki sé nema eitt barn og gefið því von um betra líf.

Svo sat Sigrún áfram með mér og fór að tína rauða glersteina upp úr krukku hérna og sagði að þetta gætu bara verið peningarnir þeirra   litla snúllan bara búin að redda málunum.

Annars er það helst í fréttum úr Vorsabænum að við vorum með 2 næturgesti hjá okkur síðustu nótt.  Þóra vinkona mín og Eydís 10 ára dóttir hennar eru á landinu (búa úti í DK) og það var nú gaman að fá þær í heimsókn.  Eydís hefur bara búið úti í Danmörku og ekki upplifað mikið sveitalíf eins og það gerist hér og var alveg uppveðruð af hestunum, folöldunum, öllum beljunum og fjósinu.  Gaman að sjá hana upplifa þetta svona  

Nú og hann Stebbi minn er að steypa sökkulinn á hænsnakofanum hér fyrir neðan fjós í þessum töluðu orðum       Skyldu verða komnar hænur næsta vor hjá okkur?

Annars er ég að spá í hvort við ættum að fá okkur naggrís.  Hvernig líst ykkur á þá hugmynd?

Föstudagur

AUGLÝSING - ÚTIMARKAÐUR

ÚTIMARKAÐUR VERÐUR HALDINN Á KRÍUNNI (það er kráin sem er við Glóru í Flóahreppi) LAUGARDAGINN 25. ÁGÚST N.K. OG ÆTLUM VIÐ Í LEIKSKÓLANUM KRAKKABORG AÐ VERA MEÐ SÖLUBÁS ÞAR.  ÞAÐ ER FJÁRÖFLUN FYRIR NÁMSFERÐINA SEM VIÐ STEFNUM Á AÐ FARA Í Á NÆSTA ÁRI TIL SVÍÞJÓÐAR.

ÝMISLEGT GOTT OG GIRNILEGT VERÐUR TIL SÖLU ÞARNA.  MÁ ÞAR NEFNA SULTUR, KÖKUR OG ANNAÐ BAKKELSI, ÝMISLEGT HANDVERK OG FLEIRA OG FLEIRA.

ALLIR AÐ MÆTA Á MARKAÐINN LAUGARDAGINN 25. ÁGÚST.  HEFST HANN KL. 12 OG VERÐUR EITTHVAÐ FRAMEFTIR DEGI. 

SJÁUMST

Mánudagur

Dreymdi í nótt að Íris B. vinkona mín hefði verið að gefa mér ráð varðandi dóttur mína og hennar hegðun, hhmmm  hmmmh!    Það boðar víst bara gott að dreyma nafnið Íris:  Í: Íris ...

Þýðing: Þetta nafn boðar farsæla lausn á máli sem hefur verið að íþyngja þér. ...  (http://www.draumar.is)  
Æ hvað var nú gott að vita það   Ekki laust við að maður þurfi smá ráðleggingar varðandi prinsessuna á bænum.  Þó maður sé leikskólakennari getur maður ekki vitað allt  
  Annars kom maðurinn minn heim með um 20 lunda í gær.  Þessi mynd er tekin út í Bjarnarey.  
  Við grilluðum nokkra og pönnusteiktum líka smá og ég held að það hafi verið betra en grillið.  Steikti hann upp úr smjöri auðvitað  

Nýjar myndir

Yo beibs!

Það eru komnar nýjar myndir inn á heimasíðu Sigrúnar (tengill hér neðar).  Myndir frá Versló nú í sumar og AAAAH.  Gleymdi að setja inn myndir frá ættarmótinu.  Fer í það fljótlega.    Stebbi fór með nokkrum félögum á slöngubát til Eyja í morgun.  Þeir fóru frá Bakka og hann hringdi í mig áðan og þá voru þeir í Bjarnarey að veiða LUNDA, nammi namm     Þarf núna að skutlast til að sækja prinsessuna í afmæli hjá vinkonu sinni sem er með henni í leikskólanum.

Yfir og út!

ooo litla rófan

Mæli með nýjum íslenskum rófum þessa dagana.  Ekkert smá safaríkar og góðar.  Og svo líka bráðhollar  

Gulrófan (Brassica napus rapifera) er upprunnin í N-Evrópu og er hennar fyrst getið með vissu í ræktun á Íslandi í upphafi 19. aldar. Hún var meðal þeirra matjurta sem fyrstar náðu útbreiðslu meðal landsmanna.

Gulrófan er C-vítamínauðug og hefur verið kölluð appelsína norðursins..

Áætluð meðalneysla á íbúa er 2,4 kg á ári. Til megin framleiðslunnar er sáð að vori (apríl / maí) en einnig eru þær forræktaðar í gróðurhúsum og plantað út í byrjun sumars. Þær gulrófur koma á markaðinn þegar geymslu gulrófurnar eru að klárast. Til að flýta uppskeru þeirra eru notaðir dúkar sem settir eru yfir eftir sáningu eða útplöntun.

Til eru íslenskir stofnar af gulrófum og eru þekktastir Kálfafellsrófa og Ragnarsrófa. Einnig hefur verið ræktaður stofn sem nefnist Sandvíkurrófa. Algengasta afbrigði í ræktun er Vige sem er norskt afbrigði og Sandvíkurrófa sem er stofn af Kálfafellsrófu

(tekið af vef Sölufélags garðyrkjumanna)

Í kjölfar þessarar fræðslu deili ég því með ykkur að ég fór í 40 mínútna stafgöngu heima í sveitinni í gær  

Skyldi átakið vera hafið?

Hef heimsótt 3% af heiminum

Já það hljómar frekar lítillega að hafa aðeins séð 3% af heiminum en það eru alls 7 lönd   Djöfull á maður mikið eftir maður.    Það er alltaf gott að eiga eitthvað eftir.  Gerðu ekkert í dag sem þú getur gert á morgun hehehe  

Reyndar hef ég nú farið nokkrum sinnum til sumra landanna eins og t.d. Spánar.  Kanaríeyjar eru hluti af Spáni þannig að þau eru komin nokkur skiptin þar og eiga eftir að bætast fleiri skipti við   Bara gaman.

Annars sit ég hér að drepast í öllum skrokknum því ég lenti í því fyrr í kvöld að hrynja niður stigann í kjallaranum heima   Ég var að bera niður matvöru til að setja í frysti og ísskápinn niðri og var á sokkunum og hrundi bara niður helv.... stigann.  Það var ekki gott og nú sit ég frekar aum hér við tölvuna því ég þurfti akkúrat að detta á vinstri hliðina sem er náttúrlega verri hliðin mín  

Lyfjaferð til Reykjavíkur á morgun þannig að ef þið verðið á ferðinni milli kl. 11 og 13.30  á morgun þá megiði heimsækja mig á göngudeildina niðri á Landsa v. Hringbraut.  Verð með gemsann á mér  og ég verð allavega í tvo tíma í stólnum út af þessu nýja lyfi sem ég er komin á (beinvarnarlyf) sem tekur 2 tíma að renna inn.

Jæja

Veðurspáin klikkaði aðeins á því fyrir helgina   því við ætluðum að vera í blíðu í Þjórsárdalnum um helgina.  Hins vegar var rokið svo mikið að ég hélt við tækjumst á loft í kviðunum sem komu, úfffff!  En við byrjuðum á því að koma fellihýsinu fyrir í dalnum (fyrst Herjólfsdalur varð ekki að raunveruleika þessa versló varð annar dalur að duga) og skelltum okkur svo í bíltúr inn í Landmannalaugar með ferðafélögunum.  Ætluðum í laugina en rokið og kuldinn var þvílíkur að það bíður betri tíma.  Fengum okkur bara nesti og héldum af stað aftur í Þjórsárdalinn og grilluðum og borðuðum öll saman í fortjaldinu hjá Kollu og Steinari og höfðum gaman.  Á sunnudaginn var veðrið nú skaplegra og allir skelltu sér í sund í Þjórsárdalslaug á meðan ég passaði hundinn.  Við Pollý skemmtum okkur vel við að kanna náttúruna og að því loknu tókum við rúnt í Þjóðveldisbæinn sem var nú bara gaman að skoða.  Svo fórum við niður að Hjálparfossi og vörðum dágóðum tíma þar.  Yndislegt veður alveg og við fleyttum kerlingar og fundum grasorma.  Sigrún og Ásdís Bára (vinkona hennar) voru mjög uppteknar af ormunum og fannst þeir bara sætir.  Sigrún ætlaði nú að taka einn með sér í bílinn og var búin að stinga honum í vasann   En hann fékk að vera áfram í Þjórsárdalnum blessaður.  Svo héldum við af stað heim á leið upp úr kvöldmat á sunnud. og enduðum í mat hjá Svövu og Einari og Stebbi fór svo á Stokkseyri til að kveikja upp í brennunni og halda flugeldasýningu með BFÁ og við Svava skelltum okkur bara með.  Ferlegt fjör og hittum fullt af skemmtilegu fólki   Sigrún fékk að vera hjá Reyni sínum á meðan og svo sóttum við hana eftir fjörið. 

Svo er ég að byrja að vinna aftur á morgun.  5 vikna sumarfrí bara búið   og maður búinn að eiga frábært frí í oftast algjörri blíðu.  Bara gaman.

Heyrumst

Verslunarmannahelgarbloggfærsla... púff

Jæja þá eru borgarbörnin mín farin aftur til síns heima eftir yndislega dvöl í sveitinni   Ég leyfði þeim nú bara að eiga alveg frjálsan dag í dag og þau horfðu held ég á 5 myndir og nokkra þætti inn á milli   já maður verður nú líka að vera góður.  Það þýðir ekki bara að píska þeim áfram í vinnu.  Neeeee ég held ég hafi nú verið nokkuð sanngjörn   Þau máluðu nú líka nokkrar myndir í dag og skutluðu sér út þegar stytti upp.          Þau fóru nú ekki heim fyrr en seint í kvöld og voru að horfa á sjónvarpið áður en þau fóru og Sigrún steinsofnaði í fanginu á Þuríði alveg búin á því eftir viðburðarríka viku.  Ég held hún hafi bara aldrei verið jafn virk og fjörug að leika sér í svona marga daga hérna í sveitinni því það vantar auðvitað leikfélaga fyrir hana flesta aðra daga   Svo er hún líka duglegri að borða þegar hún hefur börn með sér sem geta borðað mikið    ég held hún hafi bara sjaldan borðað eins mikið krakkinn

En jæja Verslunarmannahelgin bara komin og það er langt síðan ég hef fengið svona svakalegan fiðring þegar sýnt er í fréttunum frá Vestmannaeyjum og Herjólfi og því öllu geimi.... oooooohhhh.  Væri svooooo til í að vera þarna núna.  Hver ætlar að koma með okkur fjölskyldunni á næsta ári???  Pöntum bara stórt hús til að vera öll saman í og gerum gott ferðalag úr þessu.  Förum á bílnum og verum í heila viku úti í Eyjum.  Með Einsa kalda.  Er hann þar enn?  Allir saman nú tralla la la tralla la la la la...  Lífið er yndislegt sjáðu.  Það er rétt að byrja hér...

En við ætlum nú að fara af stað á morgun með fellihýsið og vera þar sem er spáð 18 stiga hita og sól   og búið að fylla á kælinn og svo er bara að bruna af stað    

Enn af vinnufólkinu...

Já það er mikið brallað í sveitinni þessa dagana.  Börnin eru búin að leika sér við hin ýmsu störf undanfarna daga.  Verið í fjósinu, hoppað á trampolíninu, horft á eina, tvær myndir, farið í sund á Selfoss, borðað pylsur hjá ömmu Þuru, mokað flórinn, borðað skúffuköku, húsmóðirin sultar úr rabarbara á meðan kýrnar eru reknar út í haga   Já það er búið að vera mikið fjör og mikið gaman. 

            Svo er ég búin að vera að leika mér með myndavélina síðustu daga.  Fékk nefninlega smá kennslu á vélina í brúðkaupinu um síðustu helgi þar sem að sessunautur minn á nákvæmlega eins vél   Myndin af fjósinu er t.d. tekin með einhverskonar bláu prógrammi.  Þá fer maður í My colours og velur Vivid Blue og þá verður blái liturinn svona líflegri   Og myndin af krökkunum er tekin með brúntóna prógrammi.  Og næturmyndin með nightshot.  Algjör snilld að geta leikið sér með þetta svona og mikil uppgötvun fyrir litla sveitalubbann að myndavélin bjóði upp á alla þessa möguleika  hehehe.  Ég var bara með hana stillta á AUTO

En jæja.  Best að hendast út í garð og reyta svolítinn arfa.  Nóg er víst af honum hér.  Ætla svo að baka pizzu handa liðinu í kvöld.

Vinnumenn úr borginni

Já vinnufólkið mitt góða er komið í sumardvölina sína   Þuríður (dóttir Guðrúnar) og Hafsteinn (sonur Sigurbjargar) eru sem sé komin og það er búið að fara 2x í fjósið og auðvitað leituðu þau uppi einn lítinn kettling sem er algjör dúlla.        Hér eru þau nýkomin frá því að reka kýrnar út í haga.  Það vantar ekki áhugann hjá unga fólkinu